Disa komente rreth akuzave

Disa komente rreth akuzave të Shejh Muhamed ibën Hadit ndaj njerëzve të pafajshëm dhe të pastër nga ajo që ua vesh.

بِسْمِ ٱللّٰهِ ٱلرَّحْمٰنِ ٱلرَّحِيمِ

Bismil-Lahi – r-Rahmani – r-Rahim

Me emrin e Allahut të Gjithëmëshirshmit Mëshiruesit

E gjithë lavdia i takon Vetëm Allahut! Salavatet dhe selamet qofshin për të Dërguarin e Allahut, për familjen e dhe për shokët e tij, si dhe për të gjithë që e ndjekin udhëzimin e tij!

Më tej:

Shejh Muhamed ibën Hadi ka bërë disa veprime, të cilat e kanë shëmtuar imazhin e shumë selefijve, duke i quajtur me emrin “saafika” dhe duke thënë për ta se u bashkëngjiten njerëzve të ëndjeve. [1]

Këto fjalë janë tebdi’ (gjykim se ata janë bidatçinj) pa sjellë argumente për pretendimin e tij. Prandaj, dëshirova t’i ndihmoj ata të cilëve u është bërë padrejtësi, duke vepruar sipas fjalës së të Dërguarit të Allahut ﷺ: “Ndihmoje vëllain tënd, qoftë ai i padrejtë ose që i bëhet padrejtësi!” Si dhe duke u nisur nga Fjala e Allahut të Lartësuar:

((قُلْ هَاتُوا بُرْهَانَكُمْ إِنْ كُنْتُمْ صَادِقِينَ))

“Thuaj: Sillini argumentet nëse jeni që e flisni të vërtetën!”

Lexuesve të nderuar ua ofroj debatin e pretendimeve të tij të zbrazëta prej argumenteve:

1 - Shejh Muhamed ibën Hadi, Allahu i dhëntë sukses, në disa fjalime të ndryshme kundër disa selefijve, të cilat janë të incizuara dhe të publikuara me zërin e tij, thotë: “Obligimi ynë, o të dashur, është që të jemi të kujdesshëm që të marrim nga dijetarët e mëdhenj, të thelluar dhe verifikues dhe të mos marrim nga të vegjlit prej fëmijëve, të cilët filluan të na hidhen nga këtu e aty” [2]

Unë them: Shpresoj të na i përmendësh emrat e këtyre dijetarëve të mëdhenj, të thelluar dhe verifikues, nga të cilët je i kujdesshëm dhe këmbëngulës që të marrësh.

2 - Shejh Muhamedi ka thënë: “...Pastaj ju porosis, o të dashur, që të vëllazëroheni mes veti ju dhe të gjithë vëllezërit tuaj Pasues të Sunnetit dhe Hadithit. Ju porosis që të vëllazëroheni mes veti dhe të largoheni nga shkaqet e përçarjes.” [3]

Them: Këto fjalë i kundërshtojnë qëndrimet e tua, të cilat i përçanë selefijtë në një numër vendesh të ndryshme. Një ndër këto qëndrime është fjala që ia ke theksuar grupit algjerian të Ferkusit që të mos bashkohen me selefijtë, të cilët apelonin për bashkim. Këto fjalë janë të incizuara me zërin tënd.

Kjo vepër bie ndesh me Fjalën e Allahut të Lartësuar:

((فَٱتَّقُوا ٱللّٰهَ وَأَصْلِحُوا ذَاتَ بَيْنِكُمْۖ وَأَطِيعُوا ٱللّٰهَ وَرَسُولَهُ إِنْ كُنْتُمْ مُؤْمِنِينَ))

“Ruhuni (zemërimit të) Allahut dhe përmirësojini raportet (pajtohuni) mes veti! Bindjuni Allahut dhe të Dërguarit të Tij, nëse jeni besimtarë.” (el-Enfal: 1)

((إِنَّمَا ٱلْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْۚ وَٱتَّقُوا ٱللّٰهَ))

“Besimtarët janë vëllezër, prandaj pajtojini vëllezërit tuaj mes veti dhe ruhuni (zemërimit të) Allahut!” (elHuxhurat: 10)

Veprimi yt bie ndesh me fjalën e Profetit ﷺ: “A t’ju tregoj një vepër që është më e mirë se shkallët e namazit, agjërimit dhe lëmoshës?” Thanë: “Po!” Ai tha: “Përmirësimi (pajtimi) mes njerëzve. Kurse, prishja mes njerëzve është shkatërruese.”

3 - Ka thënë Shejh Muhamedi: “Ndër shkaqet e përçarjes është edhe dëgjimi i këtyre të vegjëlve. Ndër shkaqet e përçarjes në këtë kohë është marrja e dijes nga këta të vegjël, nga këta saafika, të cilët i përçanë selefijtë, i përçanë Pasuesit e Sunnetit në secilin vend. Allahu na ruajttë prej tyre dhe prej veprimeve të tyre. Mos u lidhni me ta, mos i dëgjoni ata, mos kontaktoni me ta, mos i merrni fjalët e tyre dhe mos u besoni transmetimeve të tyre. Ata, pasha Allahun, janë sherr dhe dëm për ju. Ju paralajmëroj nga e gjithë kjo, o të dashur. Pasha Allahun, pas tyre nuk ka gjë përveçse fitne dhe përçarje të rreshtave të Pasuesve të Sunnetit dhe përçarje të rreshtave të selefijve. Dijetarët përpiqen për bashkimin dhe njësimin e fjalës, kurse këta saafika secilin që u hidhet atyre në prehër dhe i dëgjon fjalët e tyre ata e shkatërrojnë, madje edhe nëse është i madh në moshë. Allahu na ruajttë prej kësaj. Gjurmët e tyre i vëren të dukshme madje edhe te disa të mëdhenj.” [4]

Unë them:

1. Silli argumentet dhe faktet se këta të cilët i quan saafika i kanë përçarë selefijtë në secilin vend!

2. Mos e harro thirrjen tënde që ua ke bërë algjerianëve, të cilët janë të lidhur me ty, që të mos bashkohen me vëllezërit e tyre të cilët përpiqen shumë për bashkim.

3. Na i thuaj emrat e dijetarëve, të cilët përpiqen për bashkimin dhe njësimin e fjalës, Allahu ua shpërbleftë me të mira, pastaj ndiqe rrugën e tyre!

4. Na i thuaj emrat e disa të mëdhenjve, të cilët i kanë shkatërruar këta që i emërton me saafika.

5. Përmendi emrat e këtyre shujuhëve të mëdhenj, të cilët janë ndikuar nga ata që i quan saafika dhe përmendi këto gjurmë të dukshme tek ata.

4 - Ka thënë Shejh Muhamed ibën Hadi: “Plaku ka fituar eksperiencë dhe përvojë. Në dijen e tij nuk hyjnë dyshimet dhe atë nuk e ngadhënjen ëndja, përkundër të rinjve. Atyre u hyjnë ëndjet. Ju e shihni tani se si i mbyllin sytë ndaj katastrofave të dukshme që janë si Mali i Uhudit vetëm për shkak se i zoti i atyre katastrofave është me ta. Ata e miqësojnë vetëm pse është me ta. Jo për shkak të Fesë; jo për shkak të së vërtetës dhe udhëzimit. Kështu e rrëmben stuhia e epsheve në këtë temë, Allahu na ruajttë. Kurse te plaku nuk ngadhënjejnë ëndjet, me ndihmën dhe suksesin e Allahut ndaj tij. Të riun e lakojnë ëndjet. Sa shumë kemi parë në këto ditë! Sa e madhe është ajo që e kemi parë! Sa e çuditshme është ajo që e kemi parë nga ata të cilët e kanë shitur Fenë për Dynja dhe shejtani i ka devijuar.” [5]

Unë them:

1. Shpresoj unë dhe të tjerët që të na i thuash këto katastrofa të dukshme, të cilat janë si Mali i Uhudit.

2. Silli argumentet e qarta për miqësimin e disave prej atyre që i quan saafika me njerëz që e kanë shitur Fenë për Dynjanë dhe i ka devijuar shejtani.

5 - Ka thënë, gjithashtu: “Te këta të rinj në moshë dhe me mendje të lehtë, të cilët kanë dituri të pakët, kemi parë ndryshim në Fenë e Allahut. Ata heshtin ndaj batilit, për shkak se i zoti i tij është me ta; dhe nuk e pranojnë hakun, për shkak se i zoti i tij ua kundërshton rrugën. Këta janë shkak i të keqes në këtë kohë, Allahu na ruajttë prej kësaj!” [6]

Unë them: Silli argumentet për ndryshimin e këtyre që i quan saafika në Fenë e Allahut dhe argumentet se ata heshtin ndaj batilit për shkak të afërsisë së të zotit të tij me ata dhe se nuk e pranojnë të vërtetën për shkak se i zoti i tij ua kundërshton rrugën.

6 - Ka thënë Shejh Muhamedi: “Kanë hyrë te Rabia mësuesi i Malikut, Allahu i mëshiroftë të dy, dhe e kanë gjetur duke qarë. Ai që ka hyrë është trembur dhe është frikësuar nga qarja e tij, duke menduar se ka ndodhur ndonjë e keqe dhe i ka thënë: “A të ka ndodhur ndonjë e keqe? A të ka goditur ndonjë e keqe?”

Ai ka thënë: “Jo. Mirëpo u pyet dikush që nuk ka dituri dhe në Islam u shfaq një çështje e madhe.”

La ilahe il-lAllah! Shikoje këtë në kohën e Rabias! Ç’do të thoshte Rabia nëse na kishte parë sot me këta saafika, të cilët u hidhen njerëzve nga secili vend siç hidhen minjtë?!” [7]

Them: Shpresoj të na e përmendësh fetuanë që e kanë dhënë këta, për shkak të së cilës ka ndodhur në Islam ndonjë çështje e madhe.

7 - Ka thënë Shejh Muhamedi: “Ruhuni nga afrimi me këta të vegjël, krahas pranisë së të mëdhenjve.” [8]

Them: Unë të pyes: A i pranove ti këshillat e të mëdhenjve, në mënyrë që ky pranim të jetë hapës i mirësisë së madhe dhe mbyllës i të keqes së madhe që çon drejt shkatërrimit?!

8 - Ka thënë Shejh Muhamedi: “I riu në moshë nuk ka dituri dhe injoranca e tij shfaqet kur të dridhet tubimi. Atëherë ai nxjerr çudira dhe marrëzira dhe dëshiron që njerëzit ta mbrojnë çdo fjalë që e thotë. Kështu devijon për vete dhe i devijon të tjerët.” [9]

Them: Na i sqaro ato që i kanë nxjerrë këta, apo njëri prej tyre, prej çudirave dhe marrëzirave dhe na sqaro si duan ata, ose njëri prej tyre, që njerëzit t’i mbrojnë fjalët e tyre, apo të atij.

9 - Ka thënë Shejh Muhamedi: “Kini kujdes dhe ruhuni plotësisht që të mos mblidhen të rinjtë me të rinjtë dhe të marrin dije nga njëri-tjetri! Kjo është fatkeqësi. Kjo është ajo që i ka futur havarixhët në atë në të cilën kanë rënë. Allahu na ruajttë dhe na shpëtoftë! Çdoherë kur të shihni diçka prej kësaj, kujtojeni fjalën e Profetit ﷺ: “Të rinj në moshë dhe me mendje të lehtë.” [10]

Unë them: Përngjasimi i atyre të cilët i kundërshton me havarixhët është përngjasim i kotë.

Pastaj, disa prej këtyre, të cilët ti me të madhe i emërton me emrin saafika, kanë doktoratë në Sheriat, disa kanë magjistraturë, disa kanë diploma universitare. Kjo akuzë është gabim i madh dhe pretendimi se ata janë injorantë është gabim i dukshëm. Njerëz si këta në kohën e dy imamëve Muhamed ibën Ibrahim dhe Abdul’Aziz ibën Baz caktoheshin si profesorë dhe gjykatës dhe askush prej dijetarëve nuk kundërshtonte.

10 - Ka thënë Shejh Muhamedi: “Mos merrni dije prej këtyre! Të rinjtë sjellin risi. Prej rinisë vjen risia dhe prej të rinjve vijnë risitë. Risitë prej të rinjve janë të shumta.” [11]

Them: Këta nuk janë të rinj dhe nuk kanë sjellë asnjë risi. Ti me këtë i kundërshton dijetarët, të cilët janë më të mëdhenj se ti në moshë dhe janë prej njerëzve të dijes dhe vlerës, të cilët janë më të kapur se ti për Sunnet.

11 - Ka thënë Shejh Muhamedi: “Kujdesuni që të kapeni për të mëdhenjtë dhe largohuni prej të vegjëlve! Ruhuni prej saafikave! Ata janë kusarë që ua këputin rrugën nxënësve të dijes. Këta janë kusarë, të cilët ua këpusin rrugën nxënësve të dijes dhe i pengojnë prej shujuhëve të mëdhenj, krahas pranisë së tyre, kurse i nxisin për të vegjlit, të cilët janë si zogu që mbytet në një filxhan. Zëri i tyre është si zëri i zogut, të cilin nuk e dëgjon askush përveç ata vetë. I ngjasojnë me dijetarët dhe ua pështjellojnë njerëzve. Ua paraqesin sikur ata janë shujuh, kurse në realitet ata nuk janë ashtu, por janë nxënës dije fillestarë.” [12]

Them:

1. Na i përmend të mëdhenjtë te të cilët i referon të rinjtë!

2. Nëse këta që po i lufton kur flasin zërin e tyre nuk e dëgjon askush përveçse vetë ata, atëherë nuk ka nevojë për këtë luftë të cilën e ke ngritur kundër tyre.

3. Nuk është puna siç thua ti. Këta, të cilët je duke i luftuar, janë nxënës selefij të dijes. Fjala jote e kundërshton realitetin dhe e kundërshton veprën e dijetarëve, të cilët i kanë caktuar njerëzit si këta - dhe më të vegjël se këta në dijes dhe në diploma - i kanë caktuar profesorë dhe thirrës për tek Allahu.

12 - Ka thënë Shejh Muhamed ibën Hadi: “Këta nuk janë thelluar në dituri. Dëmi që e sjellin ata është më i madh se dobia që vjen prej tyre. Prandaj, o të dashur, kini kujdes për këtë temë dhe lidhuni me dijetarët e mëdhenj, dijetarët e Sunnetit, referencat e Sunnetit, poseduesit e dijes së vërtetuar dhe transmetimit të verifikuar.

Kurse këta të cilët na u shfaqën në kohën e fundit dhe shujuhët e ekraneve, të mbuluarit pas tyre, shujuhët e Google-s, etj... ruhuni prej tyre, sepse ata nuk posedojnë asgjë pos kësaj që ju thashë. E keqja që vjen nga ana e tyre është më e madhe se e mira që vjen prej tyre.” [13]

Them:

1. Na e sqaro domin që e kanë sjellë këta! Na i përmend emrat e dijetarëve të mëdhenj, me të cilët ti i urdhëron njerëzit që të lidhen! Lëri këto përgjithësime të shumta!

2. Na i sqaro kotësitë e atyre që i përshkruan si shujuhë të ekraneve dhe gjërat tjera që i ke përmendur.

13 - Ka thënë Shejh Muhamedi: “Nëse vjen nxënësi i dijes dhe ulet tek ata, ata nuk fillojnë menjëherë me përhapjen e batilit që e kanë, por shfaqen se janë me të mëdhenjtë, se janë me dijetarët dhe shujuhët. Mirëpo, ata janë gënjeshtarë. Pasha Allahun ata janë gënjeshtarë. I akuzojnë dijetarët në takimet e veçanta. I akuzojnë dhe i sulmojnë dijetarët. Kur mbeten me njëri-tjetrin, i flasin njëri-tjetrit për batilin e tyre që e kanë në realitet.” [14]

Them:

1. Silli argumentet për batilin që e kanë këta!

2. Silli argumentet se këta janë gënjeshtarë dhe akuzues të dijetarëve, sidomos pasi ti u betove të Allahun se ata janë gënjeshtarë dhe akuzues të dijetarëve.

14 - Pastaj ka thënë: “Ruhuni prej këtyre saafikave, të cilët ua këpusin rrugën. Ata tani kanë një dyshim të ngjashëm me dyshimin e njerëzve të bidateve: mbajtja me të mëdhenjtë, mbajtja me të mëdhenjtë, ne jemi me të mëdhenjtë... por ata janë gënjeshtarë. Kur të mbeten vetë, i kafshojnë gishtat nga mllefi. Thuaj: “Vdisni me mllefin tuaj!” Ata i akuzojnë dijetarët dhe shujuhët në takimet e tyre të veçanta.” [15]

Them:

1. Na i thuaj emrat e dijetarëve dhe shujuhëve të cilët i akuzojnë këta! Na i përmend fjalët dhe tekstin e këtyre akuzave!

2. Na i sqaro akuzat e këtyre ndaj njerëzve të dijes dhe si e këpusin rrugën e atyre që duan të arrijnë deri te njerëzit e dijes! Na i sqaro gjykimet e tyre ndaj dijetarëve!

15 - Pastaj ka thënë: “Këta janë dëm ndaj nxënësve të dijes. Janë sherr për nxënësit e dijes dhe sherr për bijtë e Sunnetit në secilin vend. Lidhja me ta është bela e madhe. Lidhja përmes rrjeteve sociale, në Twitter, Facebook, Instagram, ose ajo që ka të bëjë me WhatsApp, ose gjëra të ngjashme prej këtyre rrjeteve të reja.” [16]

Them: Ai që e lexon këtë fjalë ka nevojë për argumente të qarta dhe të dukshme. Ti nuk ke sjellë argumente për këto fjalë. I Lartësuari ka thënë:

((قُلْ هَاتُوا بُرْهَانَكُمْ إِنْ كُنْتُمْ صَادِقِينَ))

“Thuaj: Sillini argumentet nëse jeni që e flisni të vërtetën!”

Pra silli argumentet, duke e çuar në vend urdhrin e Allahut të Lartësuar, ngase njerëzit e mençur nuk i pranojnë pretendimet e zbrazëta prej argumenteve, duke u mbështetur në këtë Fjalë të Allahut.

16 - Ka thënë Shejh Muhamedi: “Mirëpo, Allahu i Lartësuar i demaskoi këta dhe i nxori të fshehtat e tyre në tweetat e tyre, të retweetat e tyre, në Twitter, në Facebook, në WhatsApp, e të ngjashme.” [17]

Them: Silli argumentet se Allahu i ka demaskuar këta dhe i ka nxjerrë fshehtësitë e tyre në tweetat e tyre... deri në fund.

17 - Pastaj ka thënë: “Disa prej tyre janë njohur vetëm para disa vjetësh. Para dy ose tre vjetësh. Pas kësaj filluan të japin gjykime ndaj dijetarëve, t’i akuzojnë dijetarët, të flasin për dijetarët dhe t’ua ndërpresin rrugën nxënësve të dijes që të mos arrijnë deri te dijetarët.” [18]

Them:

1. Urdhëro dhe bëju mirë lexuesve duke i përmendur gjykimet e këtyre ndaj dijetarëve!

2. Përmendi akuzat e tyre kundër dijetarëve dhe si ua kanë ndërprerë rrugën nxënësve të dijes që të mos arrijnë deri te dijetarët!

18 - Ka thënë Shejh Muhamedi: “Ruhuni prej tyre në mënyrën më të plotë, ngase prej tyre, pasha Allahun, nuk përfiton kush përveçse armiqtë e thirrjes selefije. Ata kanë sjellë turpe dhe marrëzi. Nëse Pasuesit e Sunnetit i shikojnë fjalët e tyre, e njohin injorancën e tyre, e ata që nuk i kanë parë fjalët e tyre nuk e dinë. Por, ai që di është argument ndaj atij që nuk di. Le të dihet se ata janë bërë argument për kundërshtarët e Pasuesve të Sunnetit, të cilët kanë filluar të argumentohen me fjalët e tyre, duke thënë se ata janë nxënës të dijetarëve dhe se ata flasin në emër të dijetarëve. Jo, pasha Allahun! Gënjejnë, pasha Zotin e Qabesë!

Mos u besoni, mos i dëgjoni, mos merrni prej tyre, ngase këta janë ndërprerës të udhës së nxënësve të dijes, ndërprerës të udhës të Pasuesve të Sunnetit. Ata e ndërpresin rrugën mes tyre dhe dijetarëve. Ruhuni, Allahu ju ruajttë, prej ithtarëve të ëndjeve! Ruhuni prej të shtirurve si nxënës dije dhe si dijetarë! Ata janë të shtirur dhe të përngjarë dhe nuk janë të tillë në realitet. Këta janë sherr dhe bela. Së shpejti Allahu do t’i demaskojë, do t’ua heqë perden, do ta demaskojë çështjen e tyre dhe do ta shfaqë poshtërsinë e tyre para syve të dëshmitarëve.” [19]

Them: Na sqaro cilat janë dobitë që i kanë përfituar armiqtë e thirrjes selefijve nga fjalët e këtyre të cilët je duke i luftuar! Na i sqaro turpet dhe marrëzirat e tyre, në mënyrë që edhe ne bashkë me ty të paralajmërojmë kundër tyre!

Si dhe them: Pas gjithë këtyre akuzave të rënda ti thua: “Së shpejti Allahu do t’i demaskojë, do t’ua heqë perden...” - deri në fund. Ky është argument se ti nuk ke argumente kundër tyre me të cilat do t’i kishe demaskuar.

I ke shtuar dhe i ke shtuar shumë fjalët kundër disa njerëzve, të cilët je duke i luftuar dhe je duke paralajmëruar kundër tyre, por nuk ke ofruar as edhe një argument për devijimin e tyre.

Nga kjo pamundësi e jotja për sjelljen e argumenteve, të cilat do t’i kishin denoncuar ata, kuptohet se ti i ke duart e zbrazëta prej argumenteve. Prandaj, ruhu prej zemërimit të Allahut dhe ki frikë prej Tij për veten tënde dhe në raport me ata. Kije gjithnjë para syve Fjalën e Allahut të Lartësuar:

((مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))

“Për çdo fjalë që ai thotë, ka pranë vetes një mbikëqyrës të gatshëm (për ta shënuar atë).”

Si dhe Fjalën e të Lartësuarit:

((يَا أَيُّهَا ٱلَّذِينَ اٰمَنُوا ٱتَّقُوا ٱللّٰهَ وَقُولُوا قَوْلًا سَدِيدًا۝ يُصْلِحْ لَكُمْ أَعْمَالَكُمْ وَيَغْفِرْ لَكُمْ ذُنُوبَكُمْۗ وَمَنْ يُطِعِ ٱللّٰهَ وَرَسُولَهُ فَقَدْ فَازَ فَوْزًا عَظِيمًا۝))

“O besimtarë, frikësojuni Allahut dhe thoni vetëm të vërtetën. Ai do t’jua bekojë veprat tuaja dhe do t’jua falë gjynahet. Kush i bindet Allahut dhe të Dërguarit të Tij, do të arrijë një fitore madhështore.”

 

Shkroi:

Rabië ibën Hadi Umejr

E Diel, 3 Shewwal 1439H

——————————

[1] - Siç qëndron në ligjëratën e tij të mbajtur natën e Shtunë, 15 Safer 1439H (4.11.2017 G), për Qendrën Ebu Bekr esSiddiku në Amerikën Veriore, të cilën e udhëheq AbdurRahman el’Umejsan, me temën “Komentim i fjalës së Imam Mufaddal ibën Muhelhel në paralajmërim kundër ithtarëve të bidateve”, minuta 36 e 40 sekonda.

[2] - Ligjëratë me titull “Bereqeti është me të mëdhenjtë tuaj”, e Enjte, 29 Muharrem 1439 (19.10.2017G), e mbajtur për vëllezërit në Darul Hadith të Imam Ibën Ebi Zejd elKajravani në qytetin Tantan, Marok. Minuta 30 e 23 sekonda.

[3] - Ligjëratë për vëllezërit shqiptarë me titull “Besimi i Pasuesve të Sunnetit dhe Xhematit në lidhje me Emrat dhe Cilësitë e Allahut”, natën e Diel, 23 Safer 1439H (10.11.2017), minuta 30 e 32 sekonda.

[4] - Ligjëratë për vëllezërit shqiptarë me titull “Besimi i Pasuesve të Sunnetit dhe Xhematit në lidhje me Emrat dhe Cilësitë e Allahut”, natën e Diel, 23 Safer 1439H (10.11.2017), minuta 59 e 52 sekonda.

[5] - Ligjëratë me titull “Bereqeti është me të mëdhenjtë tuaj”, e Enjte, 29 Muharrem 1439 (19.10.2017G), e mbajtur për vëllezërit në Darul Hadith të Imam Ibën Ebi Zejd elKajravani në qytetin Tantan, Marok. Minuta 20 e 50 sekonda.

[6] - Ligjëratë me titull “Bereqeti është me të mëdhenjtë tuaj”, minuta 27 e 37 sekonda.

[7] - Ligjëratë me titull “Bereqeti është me të mëdhenjtë tuaj”, minuta 33 e 46 sekonda.

[8] - Ligjëratë me titull “Bereqeti është me të mëdhenjtë tuaj”, minuta 11 e 56 sekonda.

[9] - Ligjëratë me titull “Bereqeti është me të mëdhenjtë tuaj”, minuta 11 e 13 sekonda.

[10] - Fjalim për banorët e Bengazit, e Shtunë 1 Safer 1439H (16.12.2017G), me titull “Dituria e saktë është mbrojtje prej fiteve”, minuta 36 e 25 sekonda.

[11] - Fjalim udhëzues për studentët e rinj të Marokut në Universitetin Islamik, minuta 23 e 44 sekonda.

[12] - Fjalim me titull “Porosi për thirrësit e teuhidit në Sudan”, minuta 37 e 29 sekonda.

[13] - Fjalim me titull “Porosi për thirrësit e teuhidit në Sudan”, minuta 43 e 22 sekonda.

[14] - “Komentim i fjalës së Imam Mufaddal ibën Muhelhel”, minuta 37 e 5 sekonda.

[15] - “Komentim i fjalës së Imam Mufaddal ibën Muhelhel”, minuta 37 e 44 sekonda.

[16] - “Komentim i fjalës së Imam Mufaddal ibën Muhelhel”, minuta 38 e 3 sekonda.

[17] - “Komentim i fjalës së Imam Mufaddal ibën Muhelhel”, minuta 38 e 46 sekonda.

[18] - “Komentim i fjalës së Imam Mufaddal ibën Muhelhel”, minuta 39 e 9 sekonda.

[19] - “Komentim i fjalës së Imam Mufaddal ibën Muhelhel”, minuta 40 e 5 sekonda.

Burimi: rabee.net

Përktheu: Xhemal Jakupi